Bretagne 2022

Tja, da ich es versemmelt habe am Land Cruiser eine schon lang anstehende Reparatur zu machen ziehen wir diesmal ganz im Stil des klassischen Bünzlitums mit dem Volvo und Wohnwagen los.

Fehlen nur noch die Plasikgeranien und der Kunststoffrollrasen (auf welchem die Spatzen verbrennen wenn sie drauf landen)🤷‍♂️

32 Grad, Füächtheiss und weni Schattä hei üs der Wunsch as Universum la sändä wo säch ungefähr „phu, mir si de froh wes chli zuäziäht u öppä ä früschä Wind chunnt“ la formulierä.

Tja, chum bim Znacht het säch i Form vor Zombiapokalypsä einisch meh zeigt; Ufs Universum isch verlass😁
Sturmböä, Gwitter u heftigi Niederschläg si spannend am Atlantik u Schlaf wird überbewärtet.
Aber wie aus het o sas sini Vorteilä.
Erschtens hani Zit für dä Blog z Beginnä.
Zwöitens schätzä mir der Luxus vom Wohnwagä scho ganz am Afang👌☺️
Merci Ändu u Jasmin für ds uslehnä🙏

Aber ganz vo Afang a:

Ganz ungwahnet ufem Volvo- Navi Paris z läsä wo süsch numä öppä ds Brothüsi oder Stou uf der A1 azeigt wird.

Der 🇸🇪 in 🇫🇷 macht säch super. Brucht mit Wohnwagä weniger Moscht aus der Land Cruiser ohni🙆🏻😁

100ti Windräder. Rächt sinnvoll u ersch no ästhetisch..

Optisch schön und mit dä Flaggä doch immer ä Bigschmack...

Witer geits im Windschattä vo dä Laschtwägä 💨 (was mä aues so lehrt bim Velofahrä☺️)

Vannes

... u afang mau di haarigä Scheichä streckä u der Komfort vo üserä Suite wahrnäh.

We das nid quasi genau ds Richtigä isch für üs👍

U wöu mä ja vorem ga ligä öppä no ds Verdouigsspatziergängli sött machä si mit no schüch dür ds Städtli gschlenderet🚶‍♀️🚶‍♂️

... üs fäut ir CH doch eifach sonä tolli Markthallä mit regionalä i früschä Läbensmittel. Grossartig👌

... oder final. Man weiss es nicht so genau😄

Das mir gross u starch wärdä💪 oder alt u fett u glückläch. Mir entscheidä no☺️

Quiberon

Mir si du witer uf Quiberon, Landzungä wo i Atlantik usägeit über nä schmali Strass wo links u rächts Meer isch.
Äs het äs erläbnisrichs Debut söuä wärdä😁

Afang mau dürä Hunger tribä is Dörfli äs Rest agstüret.

Mitem grossä Hunger wäg ohni Zmorgä und entsprächendä Erwartigä u agspannter psychologischer Verfassig hei mir ds nächschtbeschtä Resti agstüret.
Büäbu der Vegiburger u ds Meetschi ä Cesar-Salad.
D Menuwahl hätti passt was mä vor Restaurantwahl nid cha behouptä.
Der Burger chaut i grusig u der Cesarsalas het Fleisch druf gha wo eher a konserviert Cesar säuber het erinneret aus a nes bretonischs Jungtier🐤
Unässbar...

De hei mir üs entschidä üsi usgmergletä Körper a Strand ds Schwingä um di fählendi Form wenigschtens mitem passendä Teint ds kompensierä.

Am Abä d Erwartig uf ds Nacht no grösser u ds Conny het säch zur Vorfreud ä Aperol Spritz bsteut. Är her säch aus Campari-Champagner Kombo usägsteut u het entsprächend d Freud chli dämmt bim Conny wo nid gärn bitter het. I ha gärn bitter u bi entgägä am säch lärendä Glas immer voller wordä.😇

D Experimentierfreudigkeit vom Conny het säch chli gleit und sie het zur Sicherheit öppis bekannts bsteut i Form vo 🍔 u 🍟.
Da cha scho mau nüt schiäf gah, wärä da nid di grosszügig übersehnigä Letter „Andouilles“ ir Beschribig.
I ha nes feins 🐟- li bsteut.

Mit hei üsi Menu übercho und i ha gnüssläch afa ässä😋
Ds Conny o aber het o gli wieder afä zögerä.
I ha gfundä mi Fisch isch super wes nur nid so eigäartig würd schmöckä.
U ds Conny meint wären setzierä vom Burger numä so „sorry, aber irgendwiä wirdi chli kompliziert, aber da isch öppis im Burger woni muäss usänäh. Gseht komisch us...

I bi du hurti ga Googlä:

„ Andouille (Französisch: [ɑ̃ˡduj], am. Englisch: [ɑnˡdu:ɪ]) ist eine französische Wurstsorte, die ausschließlich aus Innereien hergestellt wird. Bekannt sind beispielsweise die Andouille de Vireund Andouille de Guéméné. Für diese Wurst werden Schweinedarm und -magen nach sorgfältiger Reinigung in Streifen geschnitten, gebündelt, aufgerollt und in Naturdarm eingehüllt. Nach einwöchiger Mazeration in Salz und Pfeffer werden die Würste meist drei Wochen über Buchenholz geräuchert. Danach werden sie 24 Stunden gewässert, auf 95 °C erhitzt, abschließend lässt man sie abhängen.“

Während am Vorläsä het säch einersits d Wirkig vom mit (auso eigentläch Connys) vermeintlächem Aperol Spritz i voller Breitsitä bemerkbar gmacht und Connys Reaktion ufd Beschribig vo ihrem Burgerinhalt🤣😂
Ja, äs isch ächt luschtig gsi...

Dä Tag hakä mir aus kulinarischä Tiäfpunkt vo üsnä Feriä ab.

PS: Nach däm dasi a däm
ding gschmöckt ha weissi o wohär dä Gruch isch cho🤢

Der Sunnäungergang het ä schönä u luschtigä Abä la usklingä.

Am nächschtä Morgä hei mir äs Cyclingseeing um di Landzungä gmacht.
PS: Velo derbi z ha isch top👌

U der Nami het ds Conny am Strand verbracht und ig und mi Sunnäbrand ungerem Boum (was zuägänigermassä o nid so schlächt isch gsi☺️)

Tja itz hockä mir im Wohnawagä u löh der Sturm la düräziäh bevor mir morn äs Huus witer göh.✌️

Für bescheidnigs Wätter gits glücklächerwis spannendi Optionä.
Zum Bsp. Z Lorient wo mir d U-Boot Basis und ds entsprächendä Museum bsuächt heit.

Und da Lorient zum Mekka vo dä Extremsägler ghört, stöh die wohl wäutwit innovativschtä Sägelschiffli im Hafä.

Und wie immer darf natürläch der obligat Bsuäch ir örtlächä Crêperie nid z churz cho🤓

... u am Abä het üs du nomau d Sunnä begrüsst um supi schön Znächtlä.

Penmarch

Sie wird der weschtlächscht Teil vo üserä Reis si. D Penmarch im Finistère, dem „Ende der Welt“.

Gredius isch ds nächschtä Feschtland US and A. Ziäht säch aber chli, ömu ohni Flossä🤷‍♂️

Quasi ds „Stativ“ vom vorhärigä Föttäli. Der Phare d‘Eckmühl. Isch auso äs Seich für dä wo muäss ga z Cherzli azündä u löschä, dä muäss 290 Stuäfä loufä. Mir heis probiert u einisch het glängt🥵

Quasi der „Surfshöttle“. Isch hiä normal dass säch Fahrer u Bifahrer nid chöi aluägä bim Outofahrä😄 so näs Brätt het o im nä Peugeot 106 Platz het Praxis zeigt.

Ds obligatä Poserpic😎 ds Conny het no gfiumet 🎥 das chumnt de im SRF-Sportpanorama😁

Der Strand am „Pointe de la torche“ isch ä Troum. Riesägross, der Sand wie Mehl und äs tolls Meer🌊

Ds Conny het säch kreativ usgläbt. I gloub si hets für mi gmacht🤷‍♂️☺️

Und in Concarnau isch einä vo dä gröschtä Fischereihäfä in Frankreich.
Jedä Abä chömä um die glichi Zit d Fischer zrügg was äs Highlight isch für ga z luägä u würkli z empfählä.

D Frou ir Tourischtäinformation het la verlutä dass am Mänti fasch aus zuä heig in Concarneau. Ab am Dsischti tanz de der Bär.
Am Abä hei mir dank äm nä „Insidertip“ vor Gwürzverchöiferin ä top Ladä gfundä👍

Das si übrigens d Gwürz wo d Gwürzverchöiferin het verchouft☺️

Abschiedsfoto vom „Pointe de la torche“👋

Quimper

Der Wättergott isch chli lunisch verstimmt und da mir am Strand Sunnäbadä ar Rägäduschi bevorzugä hei mir entschidä uf Quimper witerzziäh.
Äs härzigs Bretonisches Städtli wo Sightseeing, Shopping u feins ässä verspricht✌️🤗

Da muässi äuä hurti äs paar Wort drüber verlürä. Völlig unerwartet hei mir der wohl schönscht Camping agstüret wo mir jemals hei gseh.
Im Schlosspark vom nä riesä Awäsä glägä, mit Streichelzoo, Trampolinpark im Wald und u unheimläch viu Platz.
Mir si quasi für üs allei mitten im Grünen gstandä.
U am Abä si mir im Schlossinternä Resti top fein ga mampfä und super tschentli Bediänt wordä.
Aber Bilder sägä meh als 1000 Worte....

Vou Fachwärchhüser, schöni Gässli u guäti Lädäli hiä...

Äs Photo wärt o we mir d Sunntigspredig grosszügig hei usglah...

Fründä säget ehrläch, das Bild het „der goldene Preis des Photos für Götter“ verdiänt!😂 i bhautä mini Gedankä derzuä grosszügig für mi...😆

Roscoff

Nach äm nä Hin- und här wägem doch bescheidenä und chautä Wätter und der drus entstehendä Frag ob mir tatsächläch witer i Nordä wei oder a di südlächeri Atlantikküschtä wei ziäh si mir glücklächerwis doch uf Roscoff. Zwar chaut und oft rägnerisch, aber extrem schön.